رساله من شباب 25 يناير

من طرف **الكنج** السبت فبراير 05, 2011 6:52 pm

][center]size=24]سالة من شباب التحرير الى المصريين على الفيس بوك

منقولة بالنص

الثورة أنتهت.
النزول للشارع كان لأجل أغراض سياسية معينة تم اعلانها قبل ما ننزل وقبل ما يعتقل زملائنا وقبل ما ننضرب بالقنابل المسيلة للدموع والرصاص المطاطي.. وفي النهاية أتنفذت.
كان تمنها غالي جدا بس دفعناه عن طيب خاطر، مفيش حد فينا نزل يوم الجمعة ولم يقرأ الشهادة...
مفيش حد فينا نزل يوم التلات او بعده ومكانش مستني انه يعتقل من مخبرين

خسائرنا..
1- خسارة الأمن لفترة محدودة
2- خسائر اقتصادية جمة، إن شاء الله تتعوض قريبا بسواعدنا
3- إختلاف المعارضة الشبابية مع بعضها بسبب انتقال عدوى المعارضة العجوز لها.
4- مقتل شباب زي الورد في المظاهرات
5- الدم الذي اسيل في المظاهرات بدون داعي

مكاسبنا:
1-الإطاحة بحبيب العادلي وزير الإرهاب ومحاكمته قريبا
2- كسر حاجز الخوف لدى المصريين تجاه الشرطة وإسترداد كرامتنا اللي أهينت منهم على مدى سنين
3- رد الإعتبار لشباب جيلنا اللي إتظلم السنين اللي فاتوا وأتهم بإتهامات باطلة
4- لأول مرة في تاريخ مصر يجبر المصريين الفرعون على تحقيق مطالبهم بالنزول للشارع
5- إلغاء مخطط التوريث مرة وللأبد
6- طرد أحمد عز وعصابة رجال الأعمال اللي نهبوا البلد وخلونا نمشي ملط في الشارع
7- إثبات إيجابية المصريين وقدرتهم على الثورة أمام العالم كله اللي إنحنى لثورتنا إحتراما
8- إلغاء جملة " رئيس مدى الحياة " من قاموسنا
9- ترابط المصريين وتلاحمهم لا يصدقه عقل وتشكيلهم للجان الشعبية وتحضرهم في مواجهة الفوضى يثبت أن المصريين شعب قديم ثابت مستقر متحضر بطبعه مهما حاول السذج أنهم يقولوا علينا غير كده
10- إثبات للسلطة في مصر إن اللي بيحمي مصر شعبها ... مش البوليس ولا حتى الجيش...
11- في رئيس وزراء محترم جدا جه أنا مصر على إعطائه فرصة لمعرفتي بتاريخه وقدرته وأرجو من المراهقين سياسيا عدم الحكم عليه قبل تجربته.
12- المصري بره مصر دلوقتي هامته مرفوعة جدا جدا جدا جدا وممكن تسألوا اي قريب او صديق ليكم بره مصر
13- كشف القوى السياسية العرجاء العجوزة بطيئة الفهم والحركة أمام نفسها وامام الشعب، عملنا اللي مقدروش يعملوه خلال 30 سنة سواء بالمظاهرات العشراتية او بالمنافقة والمداهنة والصفقات المشبوهة مع النظام
14- كشف مدى انتهازية ووصولية القوى السياسية بلا استثناء في مصر ومحاولتهم القفز على الحركة الشبابية ونقل أمراض المعارضة المزمنة للشباب من اختلافات وتنشيف دماغ والغباء السياسي...
15- إظهار مدى عظمة الجيش المصري وإنضباطه وإلتزامه بمصلحة الوطن
في مكاسب تانية كتير حصلت مقدرش احصرها كلها

هل المكاسب دي تستحق الخسائر دي؟
في رأيي؟ أه..
محدش من اللي نزلوا المظاهرات مكانش عارف انه ممكن يموت زي ما حصل في السويس... كلهم نزلوا مطالبين بطلبات محددة وقابلين لمدى الخطورة المتوقعة لتنفيذ هذه الطلبات بم فيها الموت.
أرجوكم متتاجروش بدم الشهداء، في كام واحد مات من الأحزاب السياسة او من 6 ابريل او من الاخوان لا مؤاخذة؟
مش عارف العدد بس استطيع تخمين أنه صفر.
الشهيد نزل من بيته في مخه طلبات محددة وعارف انه ممكن يدفع كتير لتنفيذها وحصلت فعلا ...
يبقى أقل حاجة نعملها لتكريم الشهيد ده اننا ننفذ اللي كان عايزه من طلبات يوم الجمعة، منتاجرش بدمه ونبتز الناس عاطفيا والدعوة لمطالب سياسية لم يطلبها هو بنفسه !!
لا أظن ان الشهيد كان عايز ان يبقى في حكومة إئتلافية من المعارضة، ومظنش انه كان عايز البرادعي مفوض للحديث عنه، اللي متاكد منه إنه كان زيي وزي كل واحد بيقرأ الرسالة دي ..
عايز إجراءات لإنهاء البطالة والفقر والجوع والمذلة وحل البرلمان وإقالة العادلي !!
ارجوكم متستجيبوش للي بيقعدوا في مدينة الأنتاج الاعلامي ومكاتب الإرشاد ياكلوا فتة ويتكلموا ويتاجروا بدمنا واسمنا ...
كانت فين القوى السياسية لما العبارة غرقت؟
لما خالد سعيد خنقوه؟
لما البرلمان تم تزويره؟
لما سيد بلال اتقتل؟
لما الناس طهقت من حياتها وولعت في نفسها؟
مختفية في جحورها مستنية ناس يخشوا قدامهم بصدورهم يموتوا عشان خاطرهم!

الشباب خد الرصاص في صدوره والعصا على دماغه وفضى السكة لخروج السحالي والثعابين من جحورها لركوب الموجة بعد ما الداخلية اللي كانوا عايشين في حجرها وقعت !
الأنصاص قامت والقوالب نامت

اللي مش فاهمه، يعني ايه المعارضة ترفض الحوار مع نائب الرئيس قبل تنحية مبارك؟
هم خاطفين البلد مثلا؟
من اداهم الحق يتكلموا باسمنا؟
أنا نزلت المظاهرات ومش عايزهم يتكلموا باسمي ويستخدموني كرقم لإدعاء شعبية في الشارع !!
أنا مازلت عند كل الطلبات اللي طلبتها يوم الثلاث لغاية امبارح، كل طلباتي اتحققت... اي دقيقة اخرى في الشارع هي من قبيل المراهقة السياسية والسذاجة من الشباب والوصولية والانتهازية من الاحزاب العرجاء.
استحليتوا عيشة الشارع يعني ولا ايه مش فاهم؟

يا شباب كونوا منطقيين، إسقاط الرئيس تم فعلا ... بلاش طفولة ومراهقة، أنتم كنتم على قد الحدث واكتر متقللوش من شكلنا قدام اهالينا اللي رقابيهم بقت طول كده بسببنا...
فوقوا شوية من سحر القوى السياسة وقناة الجزيرة اللي أول مرة أصدق في حياتي انها عايزة تولع في مصر فعلا!!!
اخبار ملفقة وقرف مكنتش واخد بالي منه قبل كده لاني كنت اعتمد عالنت في جلب اخباري...

بن علي مش مبارك... محاولة بعض الناس استنساخ تجربة بن علي ينم عن جهل تام.
بن علي جه بانقلاب عسكري.. مبارك جه كبطل عسكري
بن علي كان في جهاز الشرطة او الأمن الداخلي... مبارك كان قائد في الطيران ونائب الرئيس
بن علي فهمه بطئ... مبارك فهم بسرعة

الله يعلم كم اكره مبارك..
بس ربنا يعلم برضه قد ايه بيعتبره المصريين رمز لمصر وقمة هرم السلطة اللي محدش يقبل يهينه قدام العالم.
أرجوكم يا شباب متهينوش رمز مصر، حيمشي بعد 6 شهور.. اللي خلانا نصبر 60 ( 6 شهور ) ميخليناش نصبر 1/60 من اللي صبرناه؟
متفضوحناش عشان التاريخ ميحكمش على ثورتنا انها كانت ثورة المراهقين والرعاع والحرامية
خلوها ثورة تصحيح مسار زي ما بدأت، ثورة بيضاء رغم الدم اللي أسيل عليها، ثورة متمش فيها الانقلاب على كل رموزنا وإقتصادنا

أنا لم أكون فخورا في حياتي بكوني مصري زي ما أنا فخور دلوقتي ومتأكد أن كلكم زيي...

ممكن نرجع لحياتنا وبيوتنا؟
ممكن مننجرش ورا تسخينات الانتهازيين والوصوليين و" الاصابع الخارجية " ؟
ممكن لو منفذش النظام ما وعد به ننزل تاني الشارع؟

شكرا ![/size]